Prishtinë, 20 janar - Në  fshatin Zllakuqan u mbajt një takim i përbashkët i Grave Deputete, kryesuar nga kryetarja e Bordit të GGD-së, Teuta Sahatqija, me gratë  Komunës së Klinës.

Në takim u diskutua për reformën zgjedhore, përfaqësimin gjinor, si dhe mundësitë e avancimit të pozitës së gruas në këtë komunë , por edhe në nivelin qendror. Znj. Teuta Sahatqija foli për punën e deputeteve të Kuvendit të Republikës së Kosovës, angazhimin dhe përkushtimin e tyre për të fuqizuar rolin e gruas, duke theksuar se kur është fjala për interesat e  gruas, deputetet janë të bashkuara, siç ishte edhe rasti kur u propozua lista njëgjinore për ambasador. 

Po ashtu, ajo  foli edhe për punën dhe rolin  e rëndësishëm që ka GGD-ja dhe  gruaja në procesin  e zhvillimit të demokracisë dhe në procesin drejt integrimit në BE, proces i cili varet edhe nga roli dhe fuqizimi i gruas në të gjitha nivelet dhe në të gjithë sektorët e shoqërisë. Znj Sahatqija foli për  rëndësinë e fuqizimit të grave në partitë politike duke filluar nga niveli lokal.

Ajo tha se nga aktivi, dega, nëndega, buron demokracia. Në vijim kryetarja e GGD-së tha se reforma zgjedhore që është në proces nuk guxon të jetë në dëm të përfaqësimit të gruas. Kuota legjislative e cila do të sigurojë përfaqësimin e gruas është domosdoshmëri për demokracinë.

Asambleistet e Klinës  folën për pozitën e  Grave  në Komunën e Klinës, e cila ende nuk kënaq. Në këtë takim u rekomandua që në Reformën Zgjedhore të aplikohet kuota gjinore legjislative konform  Ligjit për Barazinë Gjinore; të amendamentohet Ligji për Barazi Gjinore dhe të rritet zbatueshmëria e tij në mënyrë kualitative; Ligji për Partitë Politike  të përfshijë kuotat gjinore  obligative, të cilat duhet t’ i aplikojnë në aktet normative të tyre; të rritet roli i gruas në kuvendet komunale, duke fuqizuar mekanizmat gjinor ekzistues, si:  grupet e grave të komunave, Zyra për Barazi  Gjinore etj.

Po kështu,  në politikat arsimore të përfshihet perspektiva gjinore, si dhe të investohet në ngritjen e kapaciteteve profesionale dhe intelektuale  të grave dhe të  shikohet mundësia që të bëhen politika që rritin dhe favorizojnë mundësitë e punësimit të gruas.