Prishtinë, 10 tetor - Qeveria e Republikës së Kosovës në mbledhjen e saj të 41-të, të drejtuar nga kryeministri Hashim Thaçi ka miratuar Projekt-Kodin Penal të Republikës së Kosovës dhe ka aprovuar vendimin për krijimin e Komisionit Ndërministror për projektet zhvillimore të Brezovicës.
 
Projekt–Kodi Penal i Republikës së Kosovës, i cili ka marrë sot aprovimin e Qeverisë së Republikës së Kosovës, është hartuar në përputhje të standardeve  evropiane dhe shënon një hap përpara në reformimin e drejtësisë në Republikën e Kosovës. Projekt–Kodi Penal i Republikës së Kosovës do të përcillet për aprovim në Kuvendin e Kosovës.
 
Në mbledhje është aprovuar edhe vendimi për krijimin e Komisionit ndërministror që do të udhëheqë përgatitjet për projektin për zhvillimin e Brezovicës dhe për t’i zbatuar procedurat, me qëllim që të zhvillohet projekti i bazuar në investime private.

Komiteti ndërministrorë do të përbëhet nga:
1.      Mimoza Kusari-Lila, zëvendëskryeministre dhe ministre e Tregtisë dhe Industrisë
2.      Sllobodan Petroviq, zëvendëskryeministër dhe ministër i Administrimit të Pushtetit Lokal,
3.      Bedri Hamza, ministër i Financave,
4.      Bratislav Nikoliq, kryetar i Komunës së Shtërpcës,
5.      Vlora Çitaku, ministre e Integrimeve Evropiane, dhe
6.      Dardan Gashi, ministër i Mjedisit dhe Planifikimit Hapësinor.