Prishtinë, 18 gusht - Numri i ministrive në Qeverinë e Kosovës do të zvogëlohet pavarësisht se kush e formon Ekzekutivin.

Një gjë të tillë e kanë paralajmëruar të dyja kampet që pretendojnë ta formojnë Qeverinë e Kosovës: Partia Demokratike e Kosovës dhe blloku Lidhja Demokratike e Kosovës – Aleanca për Ardhmërinë e Kosovës dhe NISMA për Kosovën.

Derisa blloku LDK-AAK-NISMA e përmend mundësinë e zhbërjes së Ministrisë së Integrimeve Evropiane, në PDK nuk janë ndalur te ndonjë ministri e veçantë. Se Qeveria e Kosovës nuk ka nevojë për aq shumë ministri e kanë thënë edhe analistë politikë.

Aktualisht Qeveria e Kosovës i ka 19 ministri. Ato që janë krijuar së fundmi nga PDK-ja dhe partnerët e saj të koalicionit janë Ministria e Integrimeve Evropiane, Ministria e Forcës e Sigurisë, Ministria e Zhvillimit Ekonomik dhe Ministria e Diasporës.