Prishtinë, 19 tetor - Presidentja e Kosovës, Atifete Jahjaga, ka deklaruar se pas konsultave me kryetarin e Kuvendit Kadri Veseli dhe kryeministrin Isa Mustafa, ajo i ka ftuar për dialog liderët e partive poltike në vend për ta tejkaluar krizën politike.

"Pas  konsultimeve  me  krerët  e  institucioneve, me Kryeministrin  dhe  Kryetarin  e  Kuvendit  për  t'i  njoftuar  me  vendimin  tim,  ftoj për dialog politik  partitë  politike  parlamentare në përpjekje  për  të  tejkaluar  gjendjen  e  krijuar  në  vend", ka theksuar ajo.

Veprimet e dhunshme dhe diskursi si në institucione  dhe  jashtë  tyre  të  ditëve  të  fundit sipas saj janë  të  papranueshme  dhe rrezikojnë të lëndojnë  konsensusin  demokratik në Republikën  e  Kosovës.

"Mandati im si Presidente e vendit është të garantoj funksionimin demokratik të institucioneve  dhe  të  shërbej  si  faktor  uniteti, dhe mbi këtë bazë e ftoj spektrin politik parlamentar  të  Kosovës  që  të  pranojnë  këtë ftesë  për  dialog  për  mospajtimet  në  këto  javët e  fundit."

"Tashmë  ftesat subjekteve politike si të koalicionit qeveritar ashtu edhe partive opozitare  u  janë  dërguar,  fillimisht  për  takime  të  ndara  në  zyrën  time, dhe  përfundimisht - në mirëbesim –  në  tryezë  të  përbashkët."

"Shpresoj  që  kjo  iniciative  e  imja  të  ndihmojë që  shqetësimet  t'i  adresojmë  me  pjekuri politike  dhe  duke  dëshmuar  angazhimin  tonë që të jetësojmë përkushtimin tonë për një demokraci  parlamentare që fuqizon institucionet, forcon besimin e qytetarëve në perspektiven  e  vendit  të  tyre dhe krijon pajtimin  bazik   për   rrugën  tonë  përpara."

"I  thërras  partitë  politike  dhe  përfaqësuesit e tyre  t'i  përgjigjen  ftesës  dhe  të  tregojnë  vullnet  që  bashkërisht  të  gjejmë  gjuhë  të  përbashkët për  daljen  nga  kjo  gjendje", ka theksuar Presidenjta Jahjaga.

Tash më shumë se kurrë sipas saj është momenti t'ua dëshmojmë të gjithë qytetarëve që na e kanë besuar  udhëheqjen  e  këtij  shteti  se  dëshira  e tyre  për  të  jetuar  në  paqe,  të kenë  një ardhmëri  të  sigurt  për  ta e për brezat e ardhshëm  nuk  është  premtim  që zbehet përballë  sfidës  së parë, por udhërrëfyes, obligim,  besë  e dhënë se dallimet tona, të çfarëdo  natyre,  i  tejkalojmë  në  tryezë,  duke biseduar, duke gjetur  zgjidhje bashkërisht dhe duke  marrë  përgjegjësi   për  to.