Presidentja Jahjaga dekretoi Ligjin për Amnistinë
Dekretimi u bë duke u bazuar në nenin 80, pika 2 dhe në nenin 84, pika 5 të Kushtetutës së Republikës së Kosovës.
Shoqëria civile kishte organizuar disa protesta të zëshme,e të tjera të qeta që të kundërshtohej Ligji për amnistinë, por zëri i tyre nuk u dëgjua sa duhet.
Me marshime të shoqërisë civile, dhe mbledhje të mbi 12 mijë nënshkrimeve për ta kundërshtuar këtë ligj, asgjë nuk u arrit, pasi kushti i vendosur nga Beogradi për transformimin e strukturave të saj paralele në veri nga ilegaliteti në legalitet, kishte si garantues Brukselin dhe Uashingtonin.
Madje, nuk kryen punë as ftesat që publikisht u bëheshin deputetëve të Kuvendit të Kosovës që të mos e votojnë!
Ligji për amnistinë ishte rezultat i prodhuar nga marrëveshja 15 pikëshe ndërmjet të Kosovës dhe Serbisë, e cila u arrit më 19 prill në Bruksel.
Ligji u miratua me procedurë të shpejtuar më 11 korrik, pas disa modifikimeve në të, meqë përveç serbëve të veriut, edhe shqiptarët në jug faleshin për të bëmat e së kaluarës.
Por, shoqëria civile vazhdoi ta kundërshtojë duke mbledhur mijëra nënshkrime, të cilat, sipas drejtuesit të Institutit KIPRED, Ilir Deda, vlejnë shumë.
“Nëse 91 individë në Kuvendin e Kosovës kanë votuar për legjitimimin e krimit në Kosovë, 12,564 njerëz në Republikën e Kosovës janë kundër këtij legjitimimi. Dhe, të mos mundohet dikush të thirret në legjitimitetin e deputetëve në Kuvendin e Kosovës kur dihet se ky Kuvend është produkt i një vjedhjeje industriale të votave”, pati thënë Deda.
