Prishtinë, 21 qershor - Ish zyrtari ndërlidhës i Kosovës në Serbi, Lulzim Peci ka shpjeguar arsyet e largimit nga ky mision.

Gjatë emisionit Interaktiv në KTV me Xhemajl Rexhën ai ka thënë se kryeministri i Kosovës Hashim Thaçi e kishte mbytur me kritika për deklaratën në media se do të ishte kulmi i normalizimit të marrëdhënieve Kosovë-Serbi, njohja e Kosovës nga Serbia.

Ai mohon të jetë takuar me ndonjë person pa autorizim dhe se Ministria e Punëve të Jashtme po bën fushatë denigruese kundër tij.

Peci ka theksuar më tej se ka qenë propozimi i Ministrit të Jashtëm Enver Hoxhaj që ai të merrte këtë detyrë.

Peci u tregua i gatshëm t’i përgjigjet Komisionit për Politikë të Jashtme, apo atij të AKI-së, sepse e di që ka bërë punën me nder.