Berlin, 24 nëntor – Financimi i partive politike në pesë shtetet e Evropës Juglindore ka mungesë të masave të forta të transparencës dhe të sanksioneve për ato që i shmangen atyre, thuhet në raportin e Transparency International (TI) të publikuar sot.

Raporti i bënë thirrje Kosovës, Kroacisë, IRJ Maqedonisë, Serbisë dhe Shqipërisë për të siguruar që:
·    të ardhurat dhe shpenzimet e partive politike të raportohen saktë;
·    ato të verifikohen nga një sistem mbikëqyrës i besueshëm; dhe që
·    mungesa e zbatimit të legjislacionit mbi financimin e partive politike të sanksionohet siç duhet.
Raporti i bënë thirrje agjencive të mbikëqyrjes për të rritur përpjekjet e tyre për të zbatuar legjislacionin e ri dhe të përmirësuar për financimin e partive politike.

“Raportimi transparent nga partitë politike për burimet e të ardhurave dhe shpenzimet e tyre është në interesin e çdo shteti që është duke ndërtuar demokraci të vërtetë” ka thënë Anne Koch, Drejtoreshë Rajonale për Evropë dhe Azi Qendrore në Sekretariatin e Transparency International në Berlin. “Partitë politike do ta gëzojnë besimin e votuesve të tyre vetëm atëherë kur të kenë treguar që punojnë në interes të publikut, e jo për avancimin e tyre.”

Legjislacioni i përmirësuar është miratuar së fundmi në të gjitha shtetet që janë vlerësuar nga ky hulumtim. Kjo krijon një shans të madhe për të gjithë akterët – partitë, agjencitë mbikëqyrëse dhe të gjithë të përfshirë në mbikëqyrjen publike të financave të partive – të ndahen nga zakonet e vjetra dhe të ofrojnë më shumë transparencë në një fushë që perceptohet si e errët nga publiku në këto shtete.

Raporti i ri, ‘Ndriçimi i parave në financimin e partive politike: Shqipëria, Kroacia, Kosova, IRJ Maqedonia dhe Serbia 2011’ adreson problemet e tanishme të identifikuara në legjislacionin dhe praktikën rreth financimit të partive. Hulumtimi vlerëson dhjetë dimensione të çështjes: mbajtjen e librave të kontabilitetit nga ana e subjekteve politike; raportimin e partive në organet mbikëqyrëse; sa gjithëpërfshirëse, të detajuara dhe të besueshme janë raportet; qasja e publikut në këto informacione (publikimi); vendosjen e masave të parandalimit, sanksioneve dhe mbikëqyrjes shtetërore; si dhe aktivitetet mbikëqyrëse nga shoqëria civile.

Problemet e përbashkëta që ekzistojnë në të gjitha shtetet përfshijnë dispozitat e pamjaftueshme ligjore në masat parandaluese, mungesa e zbatimit të sanksioneve, mungesa e kapacitetit dhe e kryerjes së punëve nga ana e agjencive mbikëqyrëse, dhe mungesa e gatishmërisë nga subjektet politike për të publikuar financimin e tyre në mënyrë adekuate.

Të gjeturat dhe rekomandimet kryesore në nivel rajonal të raportit:

Bërja publike e financave të partive politike duhet të forcohet më tej me afate dhe mekanizma të qarta të publikimit në Shqipëri dhe Kosovë.

Pavarësisht nga progresi i bërë në publikimin e raporteve në Kroaci, IRJ Maqedoni dhe Serbi, agjencitë mbikëqyrëse në këto shtete duhet të nxisin transparencë më të madhe duke i publikuar raportet e auditimit të financave të partive politike në formate lehtë të përdorshme (user-friendly) dhe të krahasueshme.

Ekziston nevoja për përforcimin e masave për parandalimin e keqpërdorimit të burimeve shtetërore për fushata politike, dhe agjencitë mbikëqyrëse duhet të ndërmarrin masat e nevojshme për të vendosur sanksione për shkelje të atyre rregullave në lidhje me raportimin dhe publikimin e financave të partive politike