Prishtinë, 16 maj - Partia e Drejtësisë ka mbajtur Kuvendin e rregullt të Punës dhe Këshillin Drejtues konform statutit dhe rregullores së punës dhe me një draft politik të hartuar dhe propozuar nga anëtarët e Kryesisë drejtuar nga Kryetari i Partisë Dr. Ferid Agani.

Në këtë Kuvend të Punës, u determinuan të gjitha problemet dhe sfidat me të cilat u ballafaqua partia gjatë një viti.

Për Partinë e Drejtësisë, ky Kuvend ishte me rëndësi të veçantë për faktin se duhej të azhurnohen ndryshimet në strukturën udhëheqëse të partisë konform kërkesës së KQZ-së dhe të aprovohen rezultatet e kuvendeve të jashtëzakonshme në 7 degë.

Pas Kuvendit të Punës, Partia vazhdoi punën me Këshillin Drejtues, me përbërjen e re të aprovuar nga Kuvendi i Punës. 

Këshilli Drejtues unanimisht mori këto vendime:

- Ndryshimin në përbërjen e re të Kryesisë.

- Shkarkimin nga udhëheqja e disa anëtarëve të Kryesisë, për shkak të shkeljeve statutore.

- Votoi pro koalicionit me PDK-në si ofertë e vetme zyrtare e paraqitur në organet e partisë.

Zgjodhi listën e kandidateve për deputet nga radhët e PD-së: Ferid Agani, Ardian Sejdiu, Vesel Neziri, Merjeme Uka, Luljeta Kelmendi.

Në këtë kuvend pune, Partia e Drejtësisë mori mbështetje të fuqishme nga anëtarësia e gjerë dhe u konstatua se partia është e gatshme të hy në zgjedhjet parlamentare.