Prishtinë, 3 prill - Këshilli Drejtues i Rinisë Demokratike të Kosovës (RDK) dhe Kryetarët e Degëve kanë mbajtur sot një takim te përbashkët, ku edhe zyrtarisht kanë formalizuar nisjen e procesit zgjedhor në RDK.

Ditë me parë Kryesia e PDK-së ka vendosur që fillimi i zgjedhjeve për këtë organ të Partisë Demokratike të Kosovës të nisë nga data 3 Prill.

Në këtë takim, Kryetari i Rinisë Demokratike të Kosovës, Memli Krasniqi, ka përgëzuar anëtarët e Këshillit Drejtues dhe  Kryetarët e Degëve për punën që kanë bërë deri tash, punë kjo që ka dhënë një kontribut të çmuar në sukseset që ka shënuar Partia Demokratike e Kosovës në nivel vendi dhe ne nivel lokal që prej vitit 2007.

Ai po ashtu ka vlerësuar faktin që rinia e PDK-së, si organizata rinore politike më e madhe dhe më e konsoliduar në vend, në Konventën Zgjedhore të Partisë, është bërë pjesë edhe me e rëndësishme e strukturave udhëheqëse të PDK-së.

Më tej, kryetari Krasniqi ka kërkuar nga anëtarët e Këshillit Drejtues dhe Kryetarët e Degëve që të organizojnë një proces transparent, fer dhe demokratik, duke respektuar gjithnjë statutin e partisë dhe rregulloret përkatëse.

“Ashtu siç në vazhdimësi kemi qenë shembull për demokraci, edhe kësaj radhe, madje edhe më shumë se më parë, ne duhet të dëshmojmë vlerat tona të mirëfillta të demokracisë, për të zhvilluar një proces zgjedhor shumë transparent dhe demokratik, që të kemi një rini edhe më të fortë dhe me shtrirje edhe më të madhe”, ka thënë kryetari Krasniqi, teksa ka vlerësuar faktin se ka një interesim të madh te të rinjve, për të qenë pjesë e strukturave rinore të Partisë Demokratike të Kosovës.

Nga ana tjetër, Kryetarët e Degëve duke përshëndetur punën që kanë bërë deri tash organet drejtuese të Rinisë Demokratike të Kosovës, kanë përshëndetur nisjen e procesit zgjedhor dhe janë përkushtuar për angazhim të lartë për mbarëvajtje të procesit, i cili parashihet që të përfundojë me Konventën Zgjedhore të RDK-së nga fundi i muajit Qershor.