Prishtinë, 18 shkurt - Kryeministri i Republikës së Kosovës, Isa Mustafa, i ka dërguar telegram ngushëllimi homologut turk, Ahmet Davutoglu, duke i shprehur ngushëllimet më të sinqerta pas sulmeve vdekjeprurëse, me pasoja të rënda në njerëz, që kanë ndodhur gjatë dy ditëve të fundit në Republikën e Turqisë.

Kryeministri Isa Mustafa, ka shprehur dhimbjen dhe pikëllimin e qytetarëve dhe të Qeverisë së Kosovës për këto akte të rënda, duke theksuar solidaritetin e plotë të popullit të Kosovës me popullin turk, dhe me familjarët e viktimave.

Në telegram, kryeministri Isa Mustafa thekson përkushtimin e Qeverisë së Republikës së Kosovës në luftën e pakompromis kundër të gjitha formave të terrorizmit, në kuadër të angazhimeve të përbashkëta të botës demokratike, të prira nga Shtetet e Bashkuara të Amerikës, në luftën kundër radikalizmit të dhunshëm dhe terrorizimit global.