Prishtinë, 24 dhejtor -  Lideri i LDK-së, Isa Mustafa, ka thënë se janë duke punuar në reformimin e partisë, duke iu kundërpërgjigjur kështu deklaratës së ish-liderit të kësaj partie, Fatmir Sejdiut, i cili për “Epokën e re” ka thënë se LDK-ja ka mbetur e pareformuar.

“Po punojmë në reforma. Sejdiu mund ta ketë mendimin e vet, mirëpo ne i kemi çuar reformat përpara. Rezultatet të cilat Lidhja Demokratike ka treguar në këto zgjedhje, që ka dalë partia e parë, flasin se reformat po e bëjnë dhe e kanë bërë punën e vet”, ka thënë Mustafa të hënën. Ai, pas ceremonisë së shënimit të 24-vjetorit të themelimit të LDK-së, ka thënë se reformimi i kësaj partie ia ka sjellë fitoren në zgjedhjet e fundit. 

Ish-lideri i LDK-së, Fatmir Sejdiu, një ditë më herët në intervistën për “Epokën e re”, duke folur edhe për të ardhmen e kësaj partie, ka thënë se LDK-ja ka mbetur e pareformuar dhe me largimin e tij nga pozita e kryetarit nuk është bërë asgjë në këtë drejtim.

“LDK-ja ka mbetur e pareformuar. Në projektin tim ishin punët në fazën finale, të krijohej programi politik i LDK-së me ndihmën e ekspertëve të partive popullore, për një periudhë afatgjatë, duke e bërë LDK-në parti të qendrës së djathtë në kuptimin e plotë të fjalës.

Ata ishin përfshirë plotësisht dhe ekspertët e PP-së me ekspertët e LDK-së kishin filluar punën. Pas largimit tim nuk kam dëgjuar të jetë bërë ndonjë gjë në këtë drejtim”, është shprehur Sejdiu.

Ai ka thënë se LDK-ja ka probleme që duhet t’i hapë brenda organeve të saj. “Të fillojë një diskutim të gjerë, çfarë do të bëjë në të ardhmen. Rasti i humbjes së Prishtinës, ku LDK-ja gjithnjë ishte e fuqishme dhe pa dilemë forca kryesore që jepte kryetarin e saj, tregon se janë këputur shumë hallka thelbësore të frymës reale politike të LDK-së.

Klientelizmi dhe tendenca për të krijuar probleme aty ku nuk ka dhe për t’i fshehur problemet ku ekzistojnë mund të jenë me pasoja serioze në zgjedhjet e ardhshme parlamentare.

Unë shoh se spektri politik i Kosovës po ndryshon dhe do të ketë sfida të mëdha për partitë që u projektuan si pronare të pushteteve afatgjata. Ka ngërç dhe mbyllje që duhet kapërcyer dhe shoh gatishmëri të madhe të anëtarësisë që të bëjë këtë”, ka thënë Sejdiu.