Prishtinë, 18 mars - Kryetari i Lidhjes Demokratike të Kosovës, Isa Mustafa, ka shprehur optimizëm se do të jetë kryeministër i ardhshëm i Kosovës.

Ai ka thënë se Qeveria që do të udhëheqë nuk do të jetë megalomane, por me duar të pastra.

Në këtë intervistë për “Epokën e re”, Mustafa ka thënë se është i gatshëm të bëjë koalicion me të gjitha partitë e tjera politike, përpos me PDK-në, e cila, sipas tij, duhet të shkojë në opozitë.
 
Mustafa ka thënë se në asnjë rrethanë nuk mund të vijë në shprehje formula qeverisëse e vitit 2004. Në këtë kontekst, Mustafa ka thënë se për LDK-në posti i kryeministrit është i panegociueshëm. Lideri i LDK-së ka deklaruar se ka pajtueshmëri pothuajse nga të gjithë liderët partiakë që zgjedhjet parlamentare të mbahen në qershor.

Ai ka thënë se në listën zgjedhore të LDK-së për deputetë nuk do të ketë kandidatë të cilët kanë pasur dhe kanë probleme me ligjin. E njëjta gjë, sipas tij, do të vlejë edhe për kabinetin qeveritar.

Ai ka treguar se LDK-ja është e hapur për bashkëpunim me “Listën Rugova”, megjithatë ka thënë se nuk e ka të qartë se çfarë përfaqëson kjo listë.

“Gjithmonë kemi thënë se LDK-ja është e hapur, por tani shtrohet pyetja se çfarë përfaqëson në këtë moment ‘Lista Rugova’, sepse nuk e kemi të qartë potencialin votues të kësaj liste. LDK-ja është e hapur jo vetëm të bashkëpunojë me ‘Listën Rugova’, por të gjithë ata që kërkojnë të kthehen në LDK dyert i kanë të hapura”, ka thënë Mustafa, duke shprehur keqardhje të madhe për arrestimin e Ukë Rugovës.

Lideri i LDK-së ka folur edhe për idenë e krijimit të një tribunali për krimet e pretenduara të luftës në Kosovë.

Ai ka thënë se nuk ka asnjë arsye të krijohet ky tribunal. “Lufta jonë ka qenë specifike. Nuk kemi bërë agresion ndaj askujt. Lufta e UÇK-së ka qenë luftë e pastër, e ka mbrojtur pragun e shtëpisë.\"

\"Nuk kemi nevojë që UÇK-në ta qesim në tribunal, apo ta formojmë një tribunal të veçantë për njerëzit që kanë marrë pjesë në luftën e UÇK-së”, ka deklaruar Mustafa.