Prishtinë, 25 nëntor - Ministria e Punëve të Brendshme dënon incidentin e ndodhur me datë 23.11.2011,  në stadiumin e qytetit “Besnik Beguca” në Kaçanik, gjatë zhvillimit të ndeshjes  futbollistike ndërmjet KF Lepenci nga Kaçaniku dhe KF Drita nga Gjilani, me ç’rast disa individë kishin vendosur një pankartë që përmbante gjuhë të urrejtjes, si dhe duke djegur flamurin e Republikës së Maqedonisë.
 
Policia e Kosovës është duke hetuar rastin dhe pas analizës së informacioneve dhe dëshmive faktike, do të ndërmarrë veprimet e nevojshme për vënien para organeve të drejtësisë të personave të përfshirë në këtë akt jo civilizues.
 
Arenat sportive duhet të shërbejnë për zhvillimin dhe forcimin e lidhjeve kulturore dhe jo për të shprehur bindje politike dhe aq më pak urrejtje ndër-njerëzore.

Ftojmë të gjithë dashamirët e sportit në vendin tonë të ndjekin shembullin e sportdashësve në vendet perëndimore për të përkrahur skuadrat e tyre dhe jo të ndjekin  shembullin e grupeve të tifozëve nga disa vende të rajonit të cilët përmes aktiviteteve sportive shprehin mesazhe politike.