Prishtinë, 8 korrik - Ministrja e Punëve të Jashtme dhe Diasporës e Republikës së Kosovës, znj.Donika Gërvalla, ka zhvilluar takime të ndara në formë virtuale me homologët e saj nga Kosta Rika dhe Burkina Faso.

Gjatë takimi që pati me ministrin e Jashtëm të Kosta Rikës, z.Rodolfo Solano Quirós, ministrja Gërvalla theksoi se Kosova e vlerëson lart faktin që Kosta Rika ishte një prej vendeve të para që njohu pavarësinë e Kosovës dhe së bashku konsideruan se raportet mes të dyja vendeve janë mjaft të mira.

Ajo e njoftoi kryediplomatin e Kosta Rikës lidhur me angazhimet e qeverisë së Kosovës për të krijuar klimë të përshtatshme për investitorët e huaj. Palët biseduan për bashkëpunim bilateral, duke parë nevojën që të thellohet bashkëpunimi në fushën e ekonomisë, arsimit dhe kulturës.

Për mundësi të bashkëpunimit bilateral në fusha me interes të përbashkët, ministrja Gërvalla foli edhe me ministrin e Punëve të Jashtme të  Burkina Fasos, Alpha Barry.

Posaçërisht u diskutuan mundësitë për shkëmbim përvojash në sektorin e shëndetësisë dhe atë të mbrojtjes.

Nga ana tjetër, të dy homologët e saj paraqitën qëndrim mbështetës të shteteve që përfaqësojnë karshi Kosovës, veçanërisht për anëtarësimin e saj në organizata ndërkombëtare.
​