Prishtinë, 25 qershor - Ministri i Punëve të Jashtme i Republikës së Kosovës, Enver Hoxhaj, ka filluar një vizitë zyrtare në Slloveni, me ftesë të ministrit të Punëve të Jashtme të Sllovenisë, Karl Erjavec.
 
Gjatë qëndrimit në Lubjanë, ministri Hoxhaj përveç takimit me homologun Erjavec do të zhvillojë takime edhe me udhëheqës të tjerë të shtetit slloven.

Ministri Hoxhaj dhe ministri Erjavec do të bisedojnë për fuqizimin e mëtejshëm të bashkëpunimit bilateral dhe shkëmbimeve ndërmjet dy shteteve, për përkrahjen e Sllovenisë në proceset integruese të Kosovës si dhe çështje të tjera të rëndësishme për dy shtetet dhe rajonin.

Dy ministrat do të nënshkruajnë edhe dy marrëveshje, të cilat do të jenë në shërbim të forcimit të bashkëpunimit dhe shkëmbimeve ndërmjet Kosovës dhe Sllovenisë.