Prizren, 8 korrik - Iniciativa FEMaktiv organizon sot performancën publike të radhës “Burrat hekurosin”, ku nëpërmjet kësaj performance publike synon t\'i sfidojë rolet tradicionale gjinore.

Adelina Hasani, nga kjo Inicitivë shprehet se kjo performancë organizohet pasi ndarja e punëve të shtëpisë në Kosovë nuk bëhet në mënyrë të barabartë në mes të grave dhe burrave.

\"Përveç kësaj punët e shtëpisë ende vazhdojnë të përceptohen si obligime që i takojnë vetëm grave. Andaj nëpërmjet kësaj performance publike FEMaktiv synon t\'i sfidojë rolet gjinore duke e dhënë mesazhin që punët e shtëpisë nuk janë obligime që i takojnë vetëm grave\", thotë Hasani.

Sipas Hasanit, punët e shtëpisë janë obligime që duhen të ndahen në mënyrë të barabartë në mes të grave dhe burrave - pa dallim gjinie.

\"Arritja e barazisë gjinore në jetën private është e domosdoshme për arritjen e barazisë gjinore në jetën politike dhe publike duke i dhënë fund stereotipeve gjinore\", shprehet Hasani.

Iniciativa FEMaktiv i fton të gjithë qytetarët që të bashkangjiten në këtë performancë pubike, e cila ka për qëllim sfidimin e roleve tradicionale gjinore.

FEMaktiv është iniciativë e grave dhe vajzave të Prizrenit që synojnë ta sfidojnë mendësinë patriarkale në diskursin publik të qytetit.