Prishtinë, 18 nëntor - Këshilltari special i ish presidentit të ndjerë, Ibrahim Rugova, Ramë Maraj është shfaqur në publik dhe ka folur në një konferencë për media në periferi të Prishtinës.

Ramë Maraj që përflitej si udhëheqës i Shërbimit ''Sigurimi i Atdheut'' ka mohuar çdo lidhje me të, madje e quan fantome organizatën që thuhet se ka qenë e afërt me LDK-në.

Maraj tha se nuk ka asnjë burim se ka ekzistuar ky shërbim sekret, perveq shpifjeve në gazeten serbe “Svedok”.

Atij i ka mbetur hatri me disa njerëz që së fundi e kanë ndërlidhur emrin e tij si Shefi i ”Sigurimit të Atdheut”.

Sipas tij, Florin Krasniqi i Vetëvendosjes, zëvendëskryeministri Behgjet Pacolli, Burim Ramadani i AAK-së dhe Jeta Xharra kanë shpifur.

”Kërkoj ballafaqim publik me ta. Ka disa shkresa që tregojnë për mënyrën e paligjshme të punëve të Pacollit. Po ashtu edhe disa të tjera që tregojnë për transferimin e disa fondeve në Serbi nga Jeta Xharra. Kërkoj që ata ti komentojnë” ka thënë Maraj duke refuzuar ti ofroj.

Ndërsa për Krasniqin e Ramadanin ka thënë se habitet si e kanë përmendur emrin e tij si shefi i ''Sigurimit të Atdheut'' pa fakte.

Maraj nuk ka pranuar të ofroj detaje më shumë për sigurimin e dokumenteve, duke thënë se disa i ka siguruar në kohën kur e drejtonte gazetën ''Iliria Post''. Maraj i ka bërë ftesë publike, Behgjet Pacollit, Florin Krasniqit dhe Jeta Xharrës që të ballafaqohen me të.

Ndërkaq sa i përket takimit të tij me Kadri Veselin, ish shefin e SHIK-ut, Maraj ka treguar se është takuar me të në Kosovë, pas luftës kur edhe duhej për të mirën e Kosovës. Ai ka thënë se me Isa Mustafën, kreun e LDK-së nuk ka ndonjë kontakt. 

Në lidhje me deklarimet e Rame Maraj,  zëvendëskryeministri i Qeverisë së Republikës së Kosovës, Behgjet Pacolli ka deklaruar se nuk e njeh atë person dhe as që dëshiron ta njoh, por emrin e tij, deri më tani vetëm e ka dëgjuar. 

"Gazetën “Lajm”, për të cilën ky person flet në deklarimet e tij, nuk e ka udhëhequr asnjëherë Behgjet Pacolli, dhe asnjëherë nuk ka qenë I përfshirë në politikat redaktuese të kësaj gazete. Për këtë mund të dëshmojnë stafi i gazetarëve dhe kryeredaktorëve që kanë  qenë të angazhuar në atë medium", thuhet në reagimin e Pacollit.

Ai ka thënë me tutje se ç`farëdo letre, që ky zotëri, pretendon se posedon, le ta publikojë menjëherë, sepse zoti Behgjet Pacolli nuk i përket asaj kategorie të personave, të cilët ky zotëri pretendon se mund t`i shantazhojë dhe terrorizojë.