Prishtinë, 31 janar - Anëtaret e Bordit të GGD-ës, znj. Flora Brovina dhe znj. Donika Kadaj-Bujupi, u takuan me Grupin e Grave të Suharekës, ndërsa në takim merrte pjesë edhe Blerim Kuqi, kryetar i Komunës së Suharekës, i cili u angazhua për një ndikim më të madh në sendërtimin e fuqisë reale të gruas në jetën institucionale dhe përgjithësisht në shoqëri.

Deputetja Flora Brovina tha se gratë e kësaj ane gjithmonë  kanë  qenë aktive.

GGD-ja  përfshin gra të të gjitha partive politike , të cilat angazhohen për të drejtat e njeriut dhe të gruas.

\"Gruaja ashta forcë më vete. Shoqëria demokratike ndërtohet me pjesëmarrjen e gruas. Ligji  për Barazi Gjinore dhe Ligji  Zgjedhor i  garantojnë  gruas vend të rëndësishëm , që është një arritur e grave.\"

“Ne duhet të propozojmë gra të zonja dhe t’i përkrahim ato. Ne aktualisht s’kemi asnjë kryetare komune në  Kosovë”, theksoi znj. Brovina.

 Deputetja Donika Kadaj-Bujupi foli për rolin e rëndësishëm që ka sot gruaja në procesin  e zhvillimit të demokracisë dhe në procesin drejt integrimit në BE, proces ky që  varet edhe nga roli dhe fuqizimi i gruas në të gjitha nivelet dhe në të gjithë sektorët e shoqërisë.

Në vijim ajo foli për reformën zgjedhore, rëndësinë  që kanë zgjedhjet e besueshme dhe demokratike, bashkë me aplikimin e kuotës gjinore legjislative.

Anëtaret e Grupit të  Grave nga Suhareka, si:  Habibe  Bytyqi, Nadire Hoxha e Luljeta Baraliu shprehën shqetësimet e tyre lidhur me moszbatimin  Ligjit për Barazinë  Gjinore.

Nga ky takim u nxorën edhe disa rekomandime që kanë të bëjnë me punën e mëtejme në forcimin e pozitës së gruas .