Prishtinë, 9 janar - Liderët opozitar në fjalimet e tyre para mijëra protestuesve kanë deklaruar se ka ardhur koha që kjo qeveri që të shkoj, pasi që kanë shkel kushtetutën.

Kryetari i Vetëvendosjes, Visar Ymeri ka thënë se Qeveria e Kosovës po synon ta zhbëjë Republikën. Ka thënë se marrëveshjet e nënshkruara nga Qeveria me Serbinë e Malin e Zi tashmë janë shpallur të vdekura.

“Isa e Hashimi po vazhdojnë ta kërcënojnë Kosovën me Zajednicë”, ka thënë Ymeri, në fjalimin para protestuesve.

Ymeri ka paralajmëruar se Kryeministrit Mustafa dhe Hashim Thaçit do t’iu konfiskohet pasuria e paligjshme.

Lideri i AAK-së, Ramush Haradinaj, në fjalën e tij para protestuesve ka thënë se këta që qeverisin bashkë e kanë shpall armik njëri-tjetrin.
“Po vjen dita e juaj qytetarë. Këtyre që e kanë mashtruar qytetarin po iu thonë jo shumë qytetarë, shumë atdhetarë, të rinj dhe intelektualë. Hashim e Isë shkoni. Mos harroni është fundi i tyre”, ka thënë Haradinaj.

Kurse kryetari i Nismës, Fatmir Limaj, para masës protestuese ka thënë se ky është një fillim i ri.

“Kërkojmë së bashku ashtu siç jemi ngritur në këmbë ta mbrojmë Kushtetutën dhe vendin tonë. Ne do ta ruajmë vendin tonë, Kushtetutën tonë. Vendimi i Gjykatës Kushtetuese tregoi se kush ishin shkelësit e Kushtetutës dhe mbrojtësit e Kushtetutës”, ka thënë Limaj.

Ai ka thënë se kjo qeveri ka ra. “Ne kërkojmë zgjedhje të reja”, ka thënë Limaj.