Prishtinë, 25 shtator - Nën kryesimin e akademik Nexhat Dacit, kryetar, sot është mbajtur mbledhja e rregullt e Kryesisë së Lidhjes Demokratike të Dardanisë me përfaqësues të degëve.

Në fillim të takimit Kryetari Daci i ka njoftuar të pranishmit për aktualitetin politik në vendin tonë.

Temë kryesore e rendit të ditës edhe në mbledhjen së sotme ishte përgatitjet përfundimtare të LDD-së para fillimit të fushatës zgjedhore për zgjedhjet e ardhshme lokale të cilat do të mbahen me 3 nëntor.

Kryetari Daci i ka njoftuar të pranishmit se Komisioni Qendror Zgjedhor ka çertifikuar koalicionin AAK-LDD, dhe me këtë ka çertifikuar edhe kandidatët e saj që janë pjesë e këtij koalicioni e që gjithsej janë 56. Po ashtu akademik Daci ka njoftuar se është bërë edhe tërheqja e shortit për rënditjen e subjekteve garuese dhe koalicioni AAK-LDD do të garoj me numrin rendor 62.

Në këtë takim kryesia e LDD-së ka bërë të ditur se degën e LDD-së në Lipjan do ta udhëheqin nënkryetarët e degës znj. Mevlide Shamolli dhe Feti Krasniqi, ndërsa që Kryetari i LDD-së për Prishtinën, Shar Pllana ka demaskuar gënjeshtrën e lëshuar dje nga AKR-ja për gjoja kalimin e ish-kryetarit dhe disa anëtarëve nga dega e I e Prishtinës nga LDD në AKR.

Përsoni në fjalë nuk ishte pjesë e LDD-së nga viti 2010, ndërsa të tjerët asnjëherë nuk kanë qenë pjesë e partisë tonë.

Në fund të takimit, përfaqësuesit e degëve kanë njoftuar për aktivitetin e tyre dhe për bashkëpunimin me degët e AAK-së, tani në prag të fillimit të fushatës parazgjedhore.