Kuvendi sot pritet të votoj krijimin e Gjykatës Speciale
Kryetari i Kuvendit të Kosovës, Kadri Veseli ka thënë se themelimi i Gjykatës Speciale nuk e cenon sovranitetin e shtetit.
Edhe Presidentja e Kosovës, Atifete Jahjaga, ka kërkuar edhe njëherë që Kuvendi i Kosovës të votojë për themelimin e Gjykatës Speciale për Krime Lufte, duke thënë se ai është një obligim ndërkombëtar.
Por, përfaqësuesit e tri subjekteve opozitare kanë paralajmëruar se nuk do të marrin pjesë në seancën në të cilën pritet të ndryshohet Kushtetuta e Kosovës për Gjykatën Speciale.
Kundër themelimit të Speciales janë edhe shoqatat e dala nga lufta e UÇK, të cilët në të njëjtën kohë me fillimin e seancës do të organizojnë një protestë ku kundërshtohet themelimi i kësaj gjykate që dënon vetëm pjesëtarët e UÇK-së.
Kjo gjykatë do të hetojë dyshimet që ka ngritur një raport i Këshillit të Evropës për krime lufte të disa ish-pjesëtarëve të UÇK-së ndaj disa civilëve serbë, gjatë luftës së fundit.
Komuniteti ndërkombëtar ka paralajmëruar se nëse institucionet e Kosovës nuk e themelojnë gjykatën në fjalë, çështja do t’i kalojë Këshillit të Sigurimit të Kombeve të Bashkuara.
