Prishtinë, 28 maj - Kuvendi i Kosovës nuk po shpreh gatishmëri që të diskutojë për mandatin dhe veprimet e Misionit për Sundim të Ligjit në Kosovë - EULEX, me gjithë pakënaqësitë që janë shfaqur nga organizatat e dala nga lufta e UÇK-së.

Në veçanti, aktakuza për “Grupin e Drenicës”, ka rritur kërkesat për rishikim të punës së EULEX-it.

Kjo ka qenë njëra nga kërkesat e protestuesve të cilët të hënën me daljen me rrugë, reaguan ndaj proceseve gjyqësore për ish-ushtarët e luftës.

Megjithatë, kryeparlamentari Jakup Krasniqi, ka thënë se askush deri më sot nuk e ka ngritur në Kuvend çështjen e mandatit të EULEX-it, shkruan “Tribuna”.

“Kuvendi ka procedura dhe rregulla. Çdo kërkesë që vjen për t’u diskutuar dhe debatuar ne ia dërgojmë seancës, por për momentin nuk kemi kërkesë për të diskutuar çështjen e punës së EULEX-it”, ka thënë Krasniqi.

Pavarësisht kësaj, ai nuk ka lënë pa kritikuar veprimet e këtij misioni që, sipas tij, në asnjë moment nuk po del të jetë neutral.