Prishtinë, 10 mars - Mblidhet sërish sot Kuvendi i Kosovës, për të miratuar një rezolutë në lidhje me bisedimet me Serbinë.

Kryetari i Kuvendit Jakup Krasniqi ka shprehuar bindjen se dialogu nuk do të cënohet nga kjo rezolutë.

Në prag të seancës së sotme ku është paralajmëruar miratimi i një resolute për dialogun me Beogradin, shefat e grupeve parlamentare u takuan të mërkurën për harmonizimin e qëndrimeve, në përpjekje që Kuvendi i Kosovës t`i harmonizojë qëndrimet karshi këtij dialogu.

Krasniqi shtoi më herët se bisedimet ndërmjet Prishtinës dhe Beogradit do të krijojnë një kualitet më të mirë të jetës së qytetarëve të të dy vendeve”. Kryeministri i Kosovës, Hashim Thaçi, përshëndeti fillimin e dialogut me Serbinë dhe kërkoi që ky proces të mbështetet edhe nga opozita dhe shoqëria civile.

Në axhendën e sotme të Kuvendit është pikërisht miratimi i një rezolute për bisedimet, pasi pozita dhe opozita të mërkurën nuk arritën t`i harmonizojnë qëndrimet rreth tekstit të draft-rezolutës.