Prishtinë, 16 dhjetor - Fituesja e zgjedhjeve të 1 dhjetorit znj.Mimoza Kusari Lila, ka filluar sot punën si Kryetare e re e Komunës së Gjakovës me ç’rast fillimisht ka bërë homazhe në varrezat e Dëshmorëve dhe Martirëve në Meje dhe Çabrat, ku është pritur nga një numër i madh i familjarëve.

Në orën 10:00, znj. Kusari Lila ka pranuar edhe zyrtarisht nga ish Kryetari Pal Lekaj detyren e Kryetarës së Komunës së Gjakovës. Me këtë rast Kryetarja Kusari Lila e ka vlerësuar procesin e fundit zgjedhor  si demokratik dhe ka siguruar të gjithë banorët e Komunës së Gjakovës se do të angazhohet për përmisimin e jetës dhe zhvillimin e Komunës së Gjakovës.

“Për ne është e rëndësishme që i gjithë ky proces zhgjedhor  ka qenë shembullor, përkundër parashikimeve çka mundet me ndodhë, duhet të pasohet me qeverisje në mënyrë të mirëfillt që të gjitha ato pritje që i kanë banorët  e komunës të realizohen, por edhe të gjithë të ndihen që janë përfaqësuar.

Kërkesat janë të shumta, por edhe vullneti është i madhë, puna nuk do të mungoj për realizimin e projketeve për t’i dhënë një kahje zhvillimit të komunës së Gjakovës, me një orientim nga një ekonomi e hapur e tregut, nga një komunë dinamike dhe gjithsesi të jetë model i komunave të tjera por edhe vendeve fqinje”.

Pas aktit formal të pranim dorëzimit, znj.Kusari Lila ka vizituar stafin e administrates së Kuvendit Komunal ku është njoftuar nga afër me shërbimet që i ofrohen banorëve të Komunës së Gjakovës.

Në kuadër të ditës së parë të punës, znj.Mimoza Kusari Lila ka zhvilluar takime të shumta në institucione të ndryshme të Komunës së Gjakovës. Fillimisht, Kryetarja e re ka vizituar stacionin Policor në Gjakovë ku është pritur nga komandanti i këtij stacioni z. Krist Gjokaj i cili e ka njoftuar kryetaren me gjendjen e sigurisë në Komunën e Gjakovës.

Znj.Kusari Lila ka falenderuar pjestarët e policisë për kontributin e dhënë gjatë procesit zgjedhorë si dhe është treguar e gatshme që të bashkpunojë me policinë në rritjen e sigurisë sidomos në shkolla.

Gjatë mesdites së sotme Kryetarja e Komunës së Gjakovës znj.Mimoza Kusari Lila ka vizituar Qendren e Mjekësisë Familjare dhe Brigaden e Zjarrëfikësve në Gjakovë.