Kurti: Kthehemi e rikthehemi në Prekaz për ta kuptuar se nga vijmë e ku shkojmë
Kryeministri Kurti tha se vizituan Prekazin, këtë vend të flijimit e të bashkimit, ku tre breza të familjes Jashari u vranë nga forcat serbe, rënia heroike e të cilëve ngriti në këmbë popullin shqiptar, i dha hov Ushtrisë Çlirimtare të Kosovës dhe e zgjoi ndërgjegjen ndërkombëtare.
“Gjaku i tyre nuk humbet kurrë dhe emri i tyre nuk harrohet kurrë, dhe ne kthehemi e rikthehemi këtu në Prekaz për ta kuptuar se nga vijmë e për ta ditur më mirë se kah po duam të shkojmë”, theksoi Kryeministri, derisa rikujtoi që drejtësia për këtë krim të Serbisë nuk është vënë në vend, ashtu sikurse edhe për shumë dëshmorë e martirë të tjerë anembanë Kosovës. Kujtimi dhe malli për Shaban, Hamëz, e Adem Jasharin dhe gjithë 59 anëtarëve tjerë të familjes, gjysma e të cilëve ishin gra dhe fëmijë nuk shteret kurrë.
Nga aty, ai po ashtu bëri homazhe në Kompleksin Memorial “Dëshmorët e Kombit”, në Gllogjan, në përkujtim të 23- vjetorit të betejës së Ushtrisë Çlirimtare të Kosovës në Gllogjan, që ndryshe njihet si “Epopeja e Dukagjinit, nga ku u dha kushtrimi i lirisë në Dukagjin.
“Lufta Çlirimtare u përhap gjithandej, dhe një vit më vonë pushkëve të lirisë iu bashkëngjitën avionët e NATO-s dhe nuk vonoi e u çlirua Kosova. Pra 24 marsi i Epopesë së Dukagjinit i vitit 1998 dhe 24 marsi i ndërhyrjes së NATO-s i vitit 1999 thuajse na tregojnë rendin e logjikshëm të gjërave. Pra, së pari pushka jonë, pastaj avioni NATO-s. Ngjashëm edhe sot, së pari puna jonë e më pastaj edhe ndihma prej jashtë për zhvillim, demokratizim e për drejtësi”, shtoi Kryeministri Kurti.
Në ditë të shënuara si kjo, Kryeministri Kurti veçoi se bënë nderim për dëshmorët e kombit, ata që, siç tha ai, dhanë gjithçka që ne sot të jetojmë të lirë dhe të mund të përparojmë.
