Prishtinë, 27 shtator - Zëvendëskryeministri i Qeverisë së Republikës së Kosovës, Hajredin Kuçi takoi sot kryetarin e Komunës së Bujanocit, Shaip Kamberi. Në takim është biseduar për zhvillimet në rajon dhe mundësitë e bashkëpunimit të komunës së Bujanocit me institucionet në Kosovë.

Zëvendëskryeministri Kuçi ka shprehur qëndrimin e Qeverisë së Republikës së Kosovës për angazhimin e saj në mbështetjen e vazhdueshme për shqiptarët që jetojnë në Preshevë, Bujanoc dhe Medvegjë, për realizimin e të gjitha të drejtave kombëtare, njerëzore dhe qytetare, që ju takojnë.

Ky përkujdes do të tregohet përmes intensifikimit të krijimit të hapësirës për pjesëmarrjen e qytetarëve të këtyre komunave në sistemin arsimit, në aktivitetet kulturore dhe krijimin e një hapësire unike të informimit, ka theksuar zëvendëskryeministri Hajredin Kuçi.

Kryetari i komunës së Bujanovcit, Shaip Kamberi është angazhuar për vazhdimin e përfshirjes së të rinjve të këtyre komunave në sistemin e arsimit të lartë në Kosovë.

Në të njëjtën kohë, Kamberi ka falënderuar zëvendëskryeministrin Hajredin Kuçi për mbështetjen që Qeveria e Republikës së Kosovës i ka dhënë qytetarëve të Preshevës, Bujanocit dhe Medvegjës në të gjitha aspektet.