Kuçi: Mandati i Eulex-it duhet të përfundojë në qershor të vitit 2014
Ai ka thënë së qeveria ka bërë një strategji qysh në vitin 2011 të cilën e ka prezantuar në Bruksel.
Po ashtu sipas tij qeveria ka bërë një strategji tjetër edhe në vitin 2012, ndërsa tani e ka kompletuar dhe e ka dërguar në Kuvendin e Kosovës për miratim.
Strategjia siç ka thënë Kuçi ka për qëllim një tranzicion të lehtë, një tranzicion në koordinim me Eulex-in dhe faktorët e tjerë ndërkombëtarë.
\"Ne duam që Eulexi të largohet me formën e bashkëpunimit dhe jo dëbimit pa i plotësuar kapacitetet tona. Logjika jonë është: ngritja e kapaciteteve tona, zvogëlimi i prezencës së Eulex-it dhe jo krijimi i hapësirës për mungesë të drejtësisë. Shtylla e parë ka të bëjë me kompetencat ekzekutive, që sot është në duart e Eulex-it. Shtylla e dytë ka të bëjë me drejtimin e prokurorisë speciale, e cila po ashtu drejtohet nga Eulex-i.\"
\"Ne duam që aty fillimisht të jemi bashkëkryesues dhe më pas, që prokuroria speziale të kryesohet vetëm nga vendorët. Dhe e treta, që është edhe kryesorja: esenca e kësaj strategjie është si ta ushtrojmë ne sovranitetin e plotë dhe si ta shfrytëzojmë ekspertizën e gjyqtarëve dhe prokurorëve ndërkombëtarë. Me këtë strategji është njohur edhe faktori ndërkombëtar dhe tani jemi në fazën e negociimit\", ka theksuar Kuçi.
Ai ka thënë se qeveria ka qenë e kujdesshëm dhe është konsultuar me Parlamentin edhe para hartimit të strategjisë.
Rezoluta e Parlamentit sipas tij ka qenë më e ashpër, por qeveria ka kërkuar mirëkuptim nga deputetët që t\'i lihet hapësirë Qeverisë që të negociojë me faktorin ndërkombëtar.
Edhe në letrën që presidentja Jahjaga i ka dërguar zonjës Ashton, në shtator të vitit të kaluar, parashikohet përfundimi i mandatit të Eulex-it, në qershor të vitit 2014.
Qëllimi i qeverisë sipas tij është që mandati i Eulex-it në qershor të vitit 2014 të përfundojë kështu siç është.
\"Se si do të funksionojë më vonë, në formën e monitorimit, mentorimit apo këshillimit, kjo duhet të negociohet. Vendimet tona nuk do të jenë unilaterale, por do të merren në bazë të këshillimeve me Brukselin\", ka pohuar Kuçi.
