Prishtinë, 29 dhjetor -  Zëvendëskryeministri i Kosovës, Hajredin Kuçi, ka thënë se dialogu në Bruksel ndërmjet Kosovës dhe Serbisë ka dhënë rezultate, veçanërisht në integrimin e veriut.

Kuçi ka thënë për “Epokën e re” se dialogu në Bruksel ishte rruga më e mirë për integrimin e veriut.

“Dua ta them se dialogu ka qenë një proces që ka dhënë rezultate të veçanta, sepse ka qenë rruga më e mirë për integrimin e veriut në mënyrë paqësore dhe të dinjitetshme. Dialogu ka qenë edhe përmbyllje e kapitullit të konfliktit historik në mes të Kosovës dhe Serbisë. Natyrisht, se ka ende punë për implementim të marrëveshjeve dhe për t’u arritur ajo që unë e kam quajtur traktat i paqes. Mirëpo hapi i parë ka qenë i guximshëm dhe i vlerësuar nga faktori vendor dhe ai ndërkombëtar”, ka thënë Kuçi. 

Kuçi ka thënë se ky dialogu ka mbështetjen e Kuvendit të Kosovës. “Mos të harrojmë se ky proces ka marrë konsensus në Kuvendin e Kosovës me mbi 90 vota dhe ka fituar legjitimitet edhe në Gjykatën Kushtetuese dhe është mbështetur nga çdo aktor ndërkombëtar”, është shprehur Kuçi.

Zëvendëskryeministri i Kosovës, Hajredin Kuçi, ka falënderuar partinë e Ramush Haradinajt, AAK-në për kontributin që e ka dhënë në këtë proces dhe partinë e Isa Mustafës, LDK-në për mbështetjen që i ka dhënë këtij dialogu në Kuvendin e Kosovës.

Dialogu ndërmjet Kosovës dhe Serbisë do të vazhdojë më 17 janar të 2014-s. Kryeministri i Kosovës, Hashim Thaçi dhe ai Serbisë, Ivica Daçiq, në këtë takim pritet ta qartësojnë çështjen e gjykatave dhe mbrojtës civile për të cilat palët pretendojnë se nuk kanë marrëveshje.