Prishtinë, 26 shkurt - Kryetari i Lidhjes Demokratike të Kosovës, dr. Isa Mustafa takoi Kryetarin e Partisë Nacional Demokratike Shqiptare, z. Bujar Abdullahu, me të cilin bisedoi për bashkëpunimin e mëtejmë në mes të dy partive.

Në këtë takim, i cili u mbajt në vazhdën e takimeve që Kryetari Mustafa po mban me drejtuesit e partive të spektrit të djathtë të vendit, u bisedua edhe për përgatitjet që po bëhen për zgjedhjet e ardhshme nacionale, të cilat LDK-ja dhe PNDSh-ja vlerësojnë se duhet të mbahen në muajin qershor.

Po ashtu, liderët e LDK-së dhe të PNDSh-së u pajtuan për vazhdimin dhe thellimin e bashkëpunimit të ngushtë në mes dy partive. Me këtë rast, Kryetari Mustafa çmoi kontributin që ka dhënë PNDSh-ja në proceset e rëndësishme të lëvizjes sonë për liri dhe pavarësi. Në këtë kontekst, ai e vlerësoi edhe traditën e mirë të bashkëpunimit në mes të dy partive, e cila daton që nga koha e Presidentit Rugova.

Ndaj, edhe në këtë takim, u shtrua nevoja për shikimin e modaliteteve të forcimit të këtij bashkëpunmi, me qëllim që partitë e djathta, në këto zgjedhje, të korrin fitore sa më bindëse.