Prishtinë, 7 janar - Kryesia e Kuvendit të Republikës së Kosovës sot do të mbaj mbledhje me kryetarët e grupeve parlamentare lidhur me mbajtjen e një seance të jashtëzakonshme për arrestimin e liderit të AAK-së, Ramush Haradinaj nga autoritetet franceze.

 \"Kryesia e Kuvendit me kryetarët e grupeve parlamentare do të diskutoj shqyrtimi i kërkesës për mbajtje të seancës së jashtëzakonshme, me këtë rend dite: Mbajtja në arrest e kryetarit të Aleancës për Ardhmërinë e Kosovës, Ramush Haradinaj, në Francë\", thuhet në njoftimin e Kuvendit. 

Autoritetet franceze ndaluan, të mërkurën, në aeroportin e Bazelit, Haradinajn, mbi bazën e një urdhërarresti ndërkombëtar të lëshuar që më 2004 nga autoritetet e Serbisë, me pretendimet për krime lufte të kryera në periudhën e luftës në Kosovë.

Një gjykatë franceze mori vendimin për ta mbajtur në paraburgim ish-kryeministrin e Kosovës, “deri sa Serbia ta bëjë kërkesën zyrtare për ekstradimin e tij”.

Vendimi i Gjykatës franceze për mbajtjen e zotit Haradinaj në paraburgim i jep një afat, siç thuhet në dokument, deri në “40 ditë autoriteteve të Serbisë për të kompletuar dokumentacionin me kërkesën për ekstradimin e tij”.

Haradinaj qe arrestuar edhe në vitin 2015 në Slloveni në bazë të urdhërarrestit të policisë së Serbisë të vitit 2004 dhe qe mbajtur për disa ditë në arrest në Lubjanë.