Prishtinë, 28 qershor - Kryeministri i Republikës së Kosovës, Hashim Thaçi uron kryetarin e Partisë Socialiste të Shqipërisë, Edi Rama, me rastin e fitores së koalicionit Aleanca për Shqipërinë Evropiane në zgjedhjet e 23 qershorit 2013.

Në tekstin e urimit thuhet:

I nderuari Rama,

Në emër të Qeverisë së Republikës së Kosovës dhe në emrin tim, Ju shpreh përgëzimet më të sinqerta për zgjedhjet 23 qershorit, në të cilat Shqipëria tregoi pjekuri politike dhe  kulturë të lartë demokratike.

Fitorja e koalicionit Tuaj, qetësia, transparenca  dhe pranimi i rezultatit zgjedhor nga partitë politike shqiptare janë tregues të përcaktimit të Shqipërisë për vlera dhe integrime euroatlantike.

Duke ju uruar fitoren në zgjedhjet e 23 qershorit, shpreh besimin e plotë që qeveria e drejtuar nga lidershipi Juaj dhe i zotit Meta do ta ruajë dhe garantojë unitetin kombëtar, stabilitetin dhe prosperitetin e Shqipërisë.

Qeveria e Republikës së Kosovës është e përkushtuar që edhe më tej të thellojë bashkëpunimin me  institucionet e Republikës së Shqipërisë, në rrugën e përbashkët europiane, si dy shtete të pavarura.

Hashim Thaçi

Kryeministër i Republikës së Kosovës