Prishtinë, 7 nëntor - Kryeministri i Republikës së Kosovës, Hashim Thaçi i uron rizgjedhjen e Barack Obama, President të Shteteve të Bashkuara të Amerikës
 

Në tekstin e urimit thuhet: Shkëlqesia Juaj, president Obama,

 
Kam nderin dhe kënaqësinë e veçantë që në emrin tim dhe në emër të Qeverisë së Republikës së Kosovës, të ju uroj rizgjedhjen President i Shteteve të Bashkuara të Amerikës.

Si gjithmonë, zgjedhjet presidenciale në Shtetet e Bashkuara të Amerikës janë ngjarje madhore jo vetëm në vendin tuaj, por në tërë botën, sepse ndikimi i vendit tuaj ka përmasa globale.

Fushata parazgjedhore dhe zgjedhjet presidenciale në SHBA janë shkollë më vete për frymën e demokracisë, transparencës dhe korrektësisë që frymëzon kombet dhe shoqëritë anembanë botës.

Rizgjedhja juaj në krye të SHBA-ve për katër vitet e ardhshme, është mundësi e re e konsolidimit të politikave tuaja për ekonominë dhe prosperitetin e shoqërisë amerikane dhe thellimin e paqes në botë.

Populli i Kosovës ka përcjellë me simpati zgjedhjet presidenciale dhe vazhdon të mbetet i magjepsur me fuqinë e shpirtit amerikan, që së fundi u përball me dinjitet edhe me uraganin Sandy, duke treguar kapacitetet e pafundme të Shteteve të Bashkuara të Amerikës.

Kosova dhe qytetarët e saj i janë mirënjohës  SHBA- ve për përkrahjen dhe ndihmën që kanë dhënë si në të kaluarën, në ditët e sotme, ashtu edhe në të ardhmen.


Duke shprehur urimet më të sinqerta të Qeverisë së Kosovës dhe të qytetarëve të saj besojmë që Shtetet e Bashkuara të Amerikës nën udhëheqjen tuaj do të shënojnë rritje edhe më të madhe ekonomike, prosperitet të gjithanshëm, si dhe do të vazhdojnë të jenë liderë të arritjeve teknologjike, të forcimit të paqes, përhapjes së lirisë deh demokracisë në nivel ndërkombëtar.