Prishtinë, 12 janar - Kryeministri i Qeverisë së Republikës së Kosovës, Isa Mustafa, pranoi një telegram urimi nga Kryeministri Republikës së Francës, Manuel Valls, me rastin e zgjedhjes në pozitën e  Kryeministrit të Republikës së Kosovës.

Në telegramin e urimit të Kryeministrit Valls thuhet:

 
Zotëri Kryeministër,

Ju përcjell përgëzimet e mia të ngrohta për zgjedhjen tuaj në postin e Kryeministrit të Republikës së Kosovës.

Formimi i koalicionit në mes të partive që ndajnë vlerat demokratike të Unionit Evropian dëshmon në njërën anë një përgjegjësi dhe pjekuri politike që do të jenë jashtëzakonisht të nevojshme për të tejkaluar sfidat e shumta me të cilat duhet të përballet Kosova.

Nën udhëheqjen tuaj, në krye të një ekipi të përtërirë qeverisës duke përfshirë edhe minoritetet në mes tjerash edhe minoritetin serb, Kosova do të jetë në gjendje që me vendosmëri dhe në mënyrë efektive të ndërmarrë reforma që do t’i lejojnë të vazhdojë ecjen drejt shteteve euroatlantike, e në veçanti në fushën e sundimit të ligjit, në luftën kundër korrupsionit, në luftën kundër terrorizmit dhe në zhvillimin e një ekonomie që do të siguronte një të ardhme për rininë kosovare.

Siç e dini, Franca i jep një rëndësi të madhe rifillimit të dialogut në mes të Kosovës dhe Serbisë, zbatimit efektiv të marrëveshjeve të arritura dhe përparimeve të reja drejt normalizimit të marrëdhënieve. Ne dimë që mund të mbështetemi në angazhimin tuaj të plotë në favor të këtij procesi thelbësor për perspektivën evropiane të të dyja vendeve, si dhe për stabilitetin  rajonit.

Ju siguroj se Franca do të vazhdojë të ju shoqërojë në ndërtimin e Shtetit tuaj multietnik, dhe shprehim dëshirën tonë për të zhvilluar marrëdhënie dypalëshe gjithnjë e më të sigurta dhe më miqësore, e në veçanti me synimin për të rritur shkëmbimet tona në të gjitha fushat, duke përfshirë edhe fushën ekonomike.

Më lejoni t’iu përcjell urimet e mia për suksese në funksionin tuaj të ri.

Ju lus të pranoni, Zotëri Kryeministër, shprehjen e konsideratës time më të lartë.

Manuel Valls

Kryeministër

Republika e Francës