Prishtinë, 18 prill – Ministri i Punëve të Jashtme i Republikës së Kosovës, Enver Hoxhaj, ka pritur një delegacion të lartë të Ministrisë së Punëve të Jashtme dhe Çështjeve Evropiane të Republikës së Kroacisë, i cili qëndron për një vizitë pune në Kosovë me qëllim të zhvillimit të konsultimeve për rritjen e bashkëpunimit të gjithanshëm ndërmjet dy vendeve.
Në takimin që ministri Hoxhaj zhvilloi me delegacionin kroat, të kryesuar nga Nebojša Koharović, drejtor Gjeneral i Çështjeve Bilaterale në Ministrinë e Punëve të Jashtme dhe Çështjeve Evropiane të Kroacisë, u bisedua për thellimin e bashkëpunimit politik, ekonomik, social e arsimore mes dy shteteve.

Hoxhaj ka informuar delegacionin kroat për progresin e vazhdueshëm që po realizohet në Republikën e Kosovës, duke theksuar punën e madhe që po bëhet në proceset integruese të Kosovës në Bashkimin Evropian.

Në këtë aspekt, Hoxhaj ka shprehur vullnetin e Qeverisë së Kosovës për të përfituar nga eksperienca e suksesshme e Kroacisë në proceset integruese të Kosovës.

Ndërsa, udhëheqësi i delegacionit kroat, Nebojša Koharović dhe zëvendësministri i Punëve të Jashtme i Kosovës, Ibrahim Gashi, kanë dhënë një deklaratë për medie.
 
Koharović ka shprehur mbështetjen e plotë të Republikës së Kroacisë jo vetëm për pavarësinë e Kosovës, por edhe për të gjitha proceset e tjera që lidhen me forcimin e shtetësisë së Kosovës.

Ai ka theksuar gatishmërinë e plotë të Kroacisë për të mbështetur Kosovën në proceset integruese në Bashkimin Evropian dhe në NATO.

“Ne si Qeveri e Kroacisë, mbështesim fuqishëm Kosovën në të dy këto procese integruese sepse Kosova jo vetëm që e meriton nga faza dhe dimensionet e reformave që janë ndërmarrë gjatë katër vjetëve pas pavarësisë, por pasi që është edhe një shtet që është i paevitueshëm në çdo lloj procesi të stabilizimit të rajonit tonë”, tha Koharović.

Ai vlerësoi po ashtu se Kosova sot është definitivisht një nga partnerët e Kroacisë në rajon, duke theksuar rëndësinë e thellimit të mëtutjeshëm të marrëdhënieve bilaterale mes dy shteteve në aspektin politik, ekonomik por edhe në raportet sociale mes qytetarëve të të dyja vendeve.

Koharović ka theksuar lidhjet e forta që ekzistojnë mes dy shteteve por edhe dy kombeve tona që nga periudha e kaluar e jetës në ish-shtetin e përbashkët, duke vlerësuar se kjo miqësi tradicionale do të thellohet edhe më shumë në vazhdim, duke përfshirë edhe adresimin e çështjeve të minoriteteve tona kombëtare, shqiptarëve që jetojnë në Kroaci dhe kroatëve që jetojnë në Kosovë.
 
Nga ana tjetër, zëvendësministri i Punëve të Jashtme i Kosovës, Ibrahim Gashi tha se vizita e delegacionit kroat në Kosovë ka karakter pune dhe se gjatë takimeve konsultative do të vlerësohet shkalla e bashkëpunimit midis dy vendeve tona.

“Republika e Kosovës është shumë e interesuar që të thellojë bashkëpunimin, të rris numrin e marrëveshjeve bilaterale ndërmjet dy shteteve si dhe të përfitoj nga përvoja e Kroacisë në procesin e shtetndërtimit e mbi të gjitha nga eksperienca kroate në procesin e integrimit evropian, ku Kroacia në fakt ka kryer me shumë sukses këtë proces dhe është në fazën finale të anëtarësimit”, tha Gashi, duke shtuar se eksperienca e Kroacisë është e vlefshme jo vetëm për Kosovën, por edhe për të gjitha vendet e rajonit.

Zëvendësministri Gashi ka falënderuar z.Koharović dhe delegacionin shoqërues për gatishmërinë e tyre për të filluar këtë seri konsultimesh midis ministrive të Punëve të Jashtme të dy shteteve, me qëllim të vetëm thellimin e bashkëpunimit të gjithanshëm.