Prishtinë, 20 shkurt - Kryetari i Kuvendit të Republikës së Kosovës, Jakup Krasniqi, priti sot në një takim kryetarin e Senatit të Mbretërisë së Holandës, Fred de Graaf, i cili gjendet në vizitë me ftesë të kryekuvendarit Krasniqi.

Temë themelore e bisedimeve në takimin e sotëm ishte bashkëpunimi ndërmjet Kuvendit të Kosovës dhe Senatit të Holandës, në thellimin e marrëdhënieve të gjithmbarshme ndërmjet këtyre institucioneve dhe shteteve, sidomos në kontekstin e mbështetjes së Holandës në synimet integruese evropiane.

Duke shprehur kënaqësinë për këtë vizitë, Fred de Graaf shprehu interesimin e tij për zhvillimet në Kosovë, posaçërisht në 5 vjetët e pavarësisë, si dhe për vizionin e Kosovës në të ardhmen.

Që në fillim të fjalës së tij, kryekuvendari Krasniqi theksoi se Kosova po shënon rezultate në shumë lëmenj të jetës së gjithmbarshme politike e shoqërore, si dhe ekonomike.

Gjithë këto suksese, theksoi kryekuvendari Krasniqi, nuk i shohim si arritje vetëm të Kosovës, por edhe si fryt të mbështetjes nga BE-ja, e në këtë kuadër edhe nga Holanda mike, nga e cila asnjëherë nuk ka munguar mbështetja.

Në këtë vështrim ai shprehu mirënjohje të thellë ndaj Holandës për të gjithë atë që ka bërë e po bën për të ndihmuar Kosovën në ecjen e saj. Në këtë aspekt, Krasniqi e vlerësoi edhe këtë vizitë.

Në vijim të takimit kryekuvendari Krasniqi i bëri një vështrim të gjerë strukturës së Kuvendit, duke theksuar edhe pjesëmarrjen e serbëve dhe komuniteteve të tjera në përbërjen e Kuvendit, por edhe në Qeverinë e Kosovës.

Komuniteti serb, theksoi ai, është i integruar në jetën institucionale, pos atij në veri, i cili vjen si rrjedhojë e ndërhyrjes së drejtpërdrejtë të Beogradit.

Duke u përqendruar  në temën e liberalizimit të vizave dhe të përpjekjeve për integrim në BE, kreu i legjislativit të vendit theksoi se është vullnet unik e konsekuent i institucioneve dhe popullit të Kosovës për liberalizim të vizave dhe integrim në Bashkimin Evropian, si alternativë e vetme e së ardhmes së Kosovës.

Në këtë orientim, ka angazhime të ecet sa më shpejt, duke siguruar njëkohësisht edhe infrastrukturën përkatëse ligjore, ndërsa mbështetja e Holandës në realizimin e këtyre synimeve shikohet me shumë peshë.

Në këtë frymë, kryekuvendari Krasniqi, duke folur për sukseset që ka arritur Kosova në procesin e njohjeve nga 98 shtete të botës, përmendi problemin e 5 shteteve evropiane që nuk e kanë njohur ende Kosovën.
 
Pasi shprehu kënaqësinë për këtë vizitë, kryetari i Senatit të Mbretërisë së Holandës, Fred de Graaf, foli gjerësisht për çështjen e zhvillimeve sa i përket integrimit të Kosovës në BE dhe pengesave që dalin në këtë aspekt.

Ky proces, tha ai, është i ndërlidhur mjaft me çështjen e dialogut ndërmjet Kosovës dhe Serbisë.

Dialogu që po zhvillohet në Bruksel, që zgjat me orë të tëra,do të çojë drejt integrimeve evropiane.

Ai është shumë i rëndësishëm edhe sa i përket çështjes së njohjes së pavarësisë së Kosovës nga 5 shtetet e BE-së, që ende nuk e kanë bërë këtë.

”Shpresojmë se Kosova dhe Serbia do të shënojnë progres në këtë dialog, ndërsa do të ishte shumë zhgënjyese po të mos ketë rezultate. Në do t’ ju ndihmojmë në procesin integrues, në çdo kontekst të aktiviteteve tona në kuadër të Bashkimit Evropian”, theksoi ai.