Prishtinë, 18 mars - Dokumenti i publikuar nga mediet serbe, i cili cilësohet si propozim i Bashkimit Evropian (BE) për t’u nënshkruar si marrëveshje mes kryeministrit të Kosovës, Hashim Thaçi dhe atij të Serbisë, Ivica Daçiq, mohohet kategorikisht nga Prishtina zyrtare.

Drejtuesit e Qeverisë së Kosovës të dielën e kanë hedhur poshtë ekzistencën e një draftmarrëveshjeje të tillë, ndërsa kanë theksuar se dokumenti në fjalë është jovalid.

Draft-marrëveshja e nxjerrë nga mediet serbe përmban dhjetë pika që kanë të bëjnë me zgjidhjen e problemit të veriut, ku, përveç tjerash, thuhet se Bashkimi Evropian dhe Prishtina zyrtare propozojnë që në veri të Kosovës serbëve t’iu lejohet formimi i një institucioni të ri, i cili do të quhet “Rajoni Evropian – Veriu i Kosovës”, në vend të Asociacionit të Komunave Serbe, të cilin e kërkon Beogradi zyrtar.

Gjithnjë sipas këtij dokumenti, “Rajoni Evropian – Veriu i Kosovës”, parasheh edhe krijimin e një Gjykate të Apelit, e cila thuhet se do t;u përgjigjet institucioneve të Kosovës.

/zëri/