Prishtinë, 13 prill - Arritja e një marrëveshjeje në dialogun ndërmjet Kosovës dhe Serbisë, duket gjithnjë e më pak e mundshme.

Derisa ndërmjetësuesja e këtyre bisedimeve, baronesha Chaterine Ashton do të udhëtojë për në Beograd për të bindur palën serbe për ta nënshkruar marrëveshjen, kryeministri i Serbisë, Ivica Daçiq thotë se Serbia nuk ka ndryshuar pozicionin.

Nga ana tjetër, kryeministri i Kosovës, Hashim Thaçi, ka thënë për mediet se qëndrimi i Prishtinës është i prerë, që zgjidhja për veriun të arrihet vetëm sipas Kushtetutës dhe ligjeve të Kosovës.

Sipas kryeministrit Thaçi, Qeveria e Kosovës nuk lëviz nga ky pozicion. Në një intervistë dhënë për Radion Evropa e Lirë, ai ka thënë se Beogradi po bën dramë, dhe se është në interesin e tyre që të pranojnë marrëveshjen.

“Mbetet në duart e lidershipit të Serbisë të pranojë apo jo, sepse Kosova ka dhënë propozimet e saj, të cilat janë kushtetuese dhe ligjore dhe nga ky qëndrim nuk do të lëvizim. Serbia është në dilemën midis integrimeve apo izolimit.\"

\"Nëse zgjedh rrugën e integrimeve evropiane, duhet të arrijë marrëveshje me Kosovën”, është shprehur Thaçi, duke shtuar se Serbia po bën dramë me këtë proces, dhe se tani është momenti të lëvizet përpara.