Kosova anëtarësohet në Organizatën Ndërkombëtare të Ekspozitave
Ministria e Jashtme e Republikës së Kosovës ka marrë njoftim zyrtar nga Paris për anëtarësimin e shtetit kosovar në këtë organizatë të rëndësishme ndërkombëtare. Aplikimi për anëtarim në këtë instrument ligjor.
Sipas Ministrit të Jashtëm në detyre, Petrit Selimi, “anëtarësimi në BIE është i një rëndësie fundamentale sepse Zyra Ndërkombëtare Ekspozitave është njëra prej organizatave më të vjetra dhe më prestigjioze ndërshtetërore”.
Kosova fillimisht u konfirmua si palë e Konventës së Parisit të vitit 1928 për ekspozita ndërkombëtare, kurse së fundi pranoi konfirmimin nga sekretariati i kësaj organizate se shteti i Kosovës është bërë anëtare e 170-të e këtij organizmi.
BIE është përgjegjëse për organizimin e EXPO-ve, apo ekspozitva globale me karakter ekonomik. EXPO i vitit të kaluar në Milano pati pjesëmarrje rekorde, ndërsa Kosova nuk pati rast aty të prezantojë industrinë e ushqimit për shkak se atëbotë nuk ishte anëtare e BIE-s.
Ministria e Jashtme e Republikës së Francës edhe zyrtarisht ka njoftuar Kosovën për pranimin e instrumentit të aderimit, ndërsa javë më pas edhe sekretariati i BIE-s njoftoi anëtarësimin e Kosovës. Anëtarësimi në këtë organizatë me seli në Paris i mundëson Kosovës pjesëmarrje në ekspozitat më të rëndësishme botërore, organizimin e ekspozitave ndërkombëtare në Kosovë, si dhe një angazhim më të konsoliduar të shtetit kosovar në sferën multilaterale globale.
