Komuna e Vitisë me Plan të Integritetit
Ceremonia u mbajt në Kuvendin Komunal në Viti ku në emër të komunës dokumentin e nënshkroi Sokol Haliti, Kryetar i Komunës, kurse në emër të UNDP-së, Znj. Valbona Bogujevci, Koordinatore e Programit.
Kjo iniciativë është vazhdimësi e aktiviteteve të shumta në luftën kundër korrupsionit në nivel komunal të cilat është duke i implementuar projekti SAEK i cili mbështetet financiarisht nga Agjencia Zvicerane për Zhvillim dhe Bashkëpunim (SDC).
Plani i Integritetit paraqet procesin e zhvillimit të aftësive dhe kapaciteteve të reja të stafit komunal për të parandaluar, rezistuar dhe zbutur dukuritë korruptive.
Plani i Integritetit është njëra ndër aktivitetet që Komuna e Vitisë do të zhvillojë në bashkëpunim me programin anti-korrupsion të UNDP-së që ka për qëllim të forcojë transparencën, dhe llogaridhënien institucionale.
Aktivitete të tjera pritet të implementohen gjatë periudhës 2016 – 2020. Komuna e Vitisë është komuna e gjashtë që harton dhe zotohet të zbatojë Planin për Integritet, obligim ligjor nga Strategjia Kundër Korrupsion 2013 – 2017.
