Washington, 14 dhjetor - Presidentja e Republikës së Kosovës, Atifete Jahjaga gjatë ditës së sotme pritet t takohet me Sekretaren amerikane të Shtetit, Hillary Klinton, me ç’rast do të mbahet edhe ceremonia e nënshkrimit të marrëveshjes dypalëshe mbi ruajtjen e trashëgimisë kulturore.

Jahjaga është duke qëndruar në një vizitë 10 ditëshe në Shtetet e Bashkuara të Amerikës. Përveç me sekretaren Klinton, presidentja do të takojë edhe ish senatorin Bob Dole, të cilit do t’ia dorëzojë “Medaljen e Artë të Lirisë,” me të cilën e kishte dekoruar ish presidenti Ibrahim Rugova.

Presidentja pritet të zhvillojë takime edhe me zyrtarë të tjerë të lartë amerikanë, përfshirë drejtuesit e Ministrisë ë Mbrojtjes, FBI-së dhe Kryeprokurorin amerikan. Ajo do të mbajë fjalime në dy universitete amerikane, Johns Hopkins në Washington DC dhe Monmouth University në New Jersey.