Prishtinë, 24 qershor - Presidentja e Republikës së Kosovës, Atifete Jahjaga,  priti sot në takim një delegacion të përfaqësuesve të komunitetit egjiptian nga Kosova, Shqipëria, Maqedonia dhe nga diaspora, të udhëhequr nga deputeti i Kuvendit të Kosovës zotëri Veton Berisha, në shënim të ditës të komunitetit egjiptian në Kosovë.

Përfaqësuesi i komunitetit egjiptian Veton Berisha e njoftoi Presidenten Jahjaga me kushtet e jetës së qytetarëve të komunitetit egjiptian duke theksuar se Kosova është shembulli më i mirë në rajon për respektim e të drejtave dhe integrimin  institucional dhe shoqëror të këtij komuniteti.

Presidentja Jahjaga e vlerësoi integrimin e komunitetit egjiptian  në jetën shoqërore të Kosovës , ndërsa theksoi se Kosova është shtet i qytetarëve të barabartë dhe komuniteti egjiptian pa dallim, ndan të njëjtën perspektivë me të gjithë qytetarët e vendit.

Presidentes Jahjaga ky delegacion i përfaqësuesve të komunitetit egjiptian i dorëzoi mirënjohje me të cilën vlerësohet përkrahja dhe angazhimi i saj për integrimin e plotë të komunitetit egjiptian në jetën shoqërore dhe institucionale të Kosovës.