Prishtinë, 29 tetor -  Presidentja e Republikës së Kosovës, Atifete Jahjaga, priti sot në takim Përfaqësuesin e Posaçëm të sekretarit të përgjithshëm të OKB-së për Kosovën, Farid Zarif dhe bashkëpunëtorët e tij, me të cilët bisedoi për zhvillimet aktuale në Kosovë në prag të mbajtjes së takimit të radhës të vlerësimit tremujor të gjendjes në Kosovë në KS të OKB-së, të caktuar më 13 Nëntor.

Presidentja Jahjaga dhe zotëri Zarif diskutuan për aktualitetin politik në vend dhe përpjekjet për ndërtimin e institucioneve të Kosovës dhe Presidentja duke theksuar se përkundër faktit se po testohet edhe pjekuria politike në vend, tha se beson fuqishëm në një zgjidhje të pranueshme nga liderët e partive politike parlamentare, të cilët duhet të lënë mënjanë interesat partiake në të mirë të shtetit të Kosovës, mirëqenies së qytetarëve të saj dhe proceseve integruese.