Isa Mustafa rizgjedhet kryetar i LDK-së
Mustafa, mori besimin e delegatëve të pranishëm për një mandat të ri, me vetëm 2 vota kundër.
Punimet e Kongresit të 8 zgjedhor të LDK-së janë shoqëruar me një sërë problemesh ku 10 delegatë të diasporës janë përjashtuar nga ky Kuvend, sipas vendimit të Kryesisë, i cili ka vlerësuar se zgjedhjet në dy degë, konkretisht në Zvicër dhe Gjermani, nuk janë zhvilluar në mënyrë të rregullt.
Kundërshtarja e Mustafës, Vjosa Osmani, nuk u lejua të garojë përballë kreut aktual.
Osmani ka marr 62 vota për t’u nominuar për garën e kryetarit të LDK-së, por me këto vota ajo nuk ka arritur që t’i hyjë kësaj gare.
Në mënyrë që t’i konfirmohej kandidatura, sipas Statutit të LDK-së, Osmanit i nevojiteshin 50% +1 vota të delegatëve, ose 178 delegatë nga 355 gjithsej që ka ky Kuvend.
Në një deklaratë për mediet, deputetja Osmani e quajti diktaturë këtë që ka ndodhur, ndërsa paralajmëroi se nuk do ta pranojë udhëheqësinë e re të LDK-së. I pakënaqur me mënyrën e votimit është edhe kryetari i nderit, Fatmir Sejdiu, i cili nuk kandidoi fare.
Sejdiu, ka thënë se ka pasur presion mbi delegatët e LDK-së.
Ai ka thënë se është prekur shpirti i demokracisë me presionin që u është bërë delegatëve.
“Uroj që LDK të kthjellet dhe të ketë një qasje më racionale”, ka thënë ai.
