Prishtinë, 17 qershor - Kryeministri i Republikës së Kosovës, Hashim Thaçi në ditën e parë të vizitës së tij zyrtare në Bruksel është takuar me Komisionarin për Zgjerim të BE-së, Stefan Fule. 

Temë bosht e takimit ka qenë thellimi i përkushtimit të institucioneve të Kosovës për perspektivën evropiane të Kosovës, procesi i liberalizimit të vizave për qytetarët e Kosovës dhe marrëveshja tregtare me BE-në.
 
Kryeministri i Republikës së Kosovës, Hashim Thaçi ka njoftuar komisionarin Stefan Fule për të gjitha të arriturat e institucioneve të Kosovës, për përkushtimet e vazhdueshme për qeverisje të mirë, efektive dhe transparente, për sundimin e rendit dhe ligjit, për respektimin afirmativ të komuniteteve.
 
Kryeministri Thaçi njoftoi z.Fule edhe për procesin e anëtarësimit të Kosovës në Bankën Evropiane për Rindërtim dhe Zhvillim, duke kërkuar njëkohësisht mbështetjen e tij për arritjen edhe të një vote shtesë të nevojshme për anëtarësimin e Kosovës në këtë institucion të rëndësishëm financiar.
 
Kosova është në pritje të rekomandimeve të BE-së për pyetësorin për marrëdhëniet tregtare. Qeveria e Republikës së Kosovës është e përgatitur dhe e gatshme për pranimin e udhërrëfyesit për liberalizimin e vizave, - theksoi kryeministri Thaçi në takim dhe shtoi se Kosova ka ndërtuar raporte shumë të mira me fqinjët, me Shqipërinë, Maqedoninë dhe Malin e Zi, si dhe është e interesuar të ndërtojë raporte të mira fqinjësore si dy shtete të pavarura edhe me Serbinë, në shërbim të bashkëpunimit rajonal.
 
Me këtë rast, përfaqësuesit e Komisionit Evropian kanë falënderuar kryeministrin Hashim Thaçi për suksesin e arritur nga Qeveria e Kosovës në përmbushjen e kritereve teknike në funksion të pranimit të udhërrëfyesit për liberalizim të vizave. Ata kanë siguruar që deri në fund të verës, pritet që Kosova të pranojë udhërrëfyesin për liberalizim të vizave.
 
Në takim me komisionarin e BE-së për Zgjerim, Stefan Fule, kryeministri Thaçi është zotuar për vazhdimin dhe thellimin e bashkëpunimit të mirë me EULEX-in dhe Komisionin Europian, sidomos në reformimin e sistemit të drejtësisë dhe në forcimin e sundimit të ligjit.
 
Institucionet e Kosovës do të vazhdojnë t’i përmbushin të gjitha detyrat që dalin nga procesi i integrimit në BE, me një dinamikë më të përshpejtuar, që garanton suksesin tonë të gjithmbarshëm – është shprehur z.Thaçi.