Prishtinë, 20 qershor - Ministri i Punëve të Jashtme i Republikës së Kosovës, Enver Hoxhaj, ka pritur sot në një takim Drejtorin Gjeneral për Politika Evropiane në Ministrinë e Punëve të Jashtme të Republikës së Sllovenisë, Tadej Rupel.

Gjatë takimit, Ministri Hoxhaj shprehu përkushtimin e Republikës së Kosovës për të forcuar marrëdhëniet bilaterale me Slloveninë, në të gjitha aspektet, përfshirë edhe fuqizimin e shkëmbimeve në fushën e diplomacisë.

Hoxhaj e njoftoi Drejtorin Rupel për progresin në Kosovë, me theks të veçantë për agjendën evropiane të Republikës së Kosovës.

Në këtë kontekst, Hoxhaj vlerësoi rëndësinë e përkrahjes konkrete të Sllovenisë për Kosovën në proceset integruese.

Në anën tjetër, Drejtori Gjeneral për Politika Evropiane në Ministrinë e Punëve të Jashtme të Republikës së Sllovenisë, Tadej Rupel, vlerësoi progresin në Kosovë, duke shprehur përkushtimin e Sllovenisë për të vazhduar përkrahjen për Kosovën, në proceset euro-integruese.