Prishtinë, 5 dhjetor - Ministri i Punëve të Jashtme i Republikës së Kosovës, Enver Hoxhaj, ka pritur në takim ambasadorin e Irlandës në Budapest, jo-rezident në Kosovë, Kevin Dowling.

Ministri Hoxhaj ka shprehur mirënjohjen e Kosovës për përkrahjen që shteti dhe qytetarët e Irlandës kanë dhënë për Kosovën.

Hoxhaj e ka informuar ambasadorin Dowling për progresin e vazhdueshëm në Republikën e Kosovës dhe hapat e fuqishëm në proceset integruese.

Në këtë kontekst, ministri i Jashtëm i Kosovës, shprehu bindjen që Irlanda do të vazhdojë mbështetjen e Kosovës për liberalizimin e vizave për kosovarët si dhe për nënshkrimin e Marrëveshjes së Stabilizim Asocimit ndërmjet Kosovës dhe Bashkimit Evropian.

Ambasadori i Irlandës në Budapest, jo-rezident në Kosovë, Kevin Dowling, vlerësoi lart progresin e arritur në Kosovë, duke shprehur përkrahjen e fuqishme të shtetit të tij për forcimin e subjektivitetit ndërkombëtar të Republikës së Kosovës dhe veçanërisht për proceset integruese në Bashkimin Evropian.

Përkrahja e Irlandës në procese integruese të Kosovës pritet të fuqizohet edhe më shumë, gjatë mandatit të kryesimit të BE-së nga ana e Irlandës.