Prishtinë, Prekaz, 17 shkurt - Presidentja Jahjaga bëri homazhe para varrit të presidentit historik Ibrahim Rugova dhe në Kompleksin Memorial në Prekaz


Në kuadër të aktiviteteve në shënimin e gjashtëvjetorit të pavarësisë së vendit, Presidentja e Republikës së Kosovës, zonja Atifete Jahjaga bëri sot homazhe para varrit të presidentit Ibrahim Rugova.


Në një deklaratë bërë me këtë rast ajo theksoi:

 
Në këtë gjashtëvjetor të shënimit të pavarësisë së Republikës së Kosovës, erdhëm të bëjmë nderime pranë varrit të presidentit të parë, historik, dr. Ibrahim Rugova, njeriut i cili me politikën aktive paqësore dhe me platformën për liri, pavarësi, demokraci, arriti të mobilizojë dhe të mbledhë gjithë popullin rreth programit të tij politik dhe arriti që të fitojë përkrahjen e fuqishme ndërkombëtare, fillimisht të SHBA-së dhe të vendeve të Bashkimit Evropian. Njeriut i cili krijoi strukturat autonome të të gjitha institucioneve të Republikës së Kosovës, në kushte të okupimit.


Presidentja e Republikës së Kosovës, zonja Atifete Jahjaga bëri sot homazhe edhe në Kompleksin Memorial në Prekaz.
 

“Lufta e lavdishme e Ushtrisë Çlirimtare të Kosovës, rënia e komandantit legjendar Adem Jashari, sakrifica sublime e familjes Jashari dhe rënia në altarin e lirisë e të gjithë bijve dhe bijave të popullit tonë, janë themelet e shtetit të Republikës së Kosovës”, theksoi Presidentja Jahjaga gjatë homazheve në Prekaz.

 

Presidentja Jahjaga theksoi se këto janë dëshmia më e mirë që lufta për lirinë dhe procesi i shtetndërtimit të shtetit tonë nuk ka qenë aq e lehtë, për të ardhur te dita kur sot populli ynë është një popull i lirë, është një popull sovran, sikurse edhe të gjithë popujt e Evropës, në miqësi të përjetshme me Shtetet e Bashkuara të Amerikës.