Prishtinë, 4 prill - Deputeti i Kuvendit të Kosovës nga radhët e Aleancës për Ardhmërinë e Kosovës (AAK), Daut Haradinaj, ka thënë se koalicioni PDK - LDK ka harruar premtimet për hapje të vendeve të reja pune.

Në një intervistë për “Epokën e re”, Haradinaj ka thënë se presin shumë pak nga Qeveria e drejtuar nga Isa Mustafa, pasi programi qeverisës më shumë është duke tingëlluar si fontanë dëshirash. Sipas tij, ky program do të realizohej po sikur Kosova ta kishte buxhetin e Zvicrës.

“Programi qeveritar më shumë po tingëllon si fontanë dëshirash sesa një realitet, sepse ne e dimë sa është buxheti i Kosovës. Këto çfarë i kanë shkruar këta në raportin e 100 ditëve të punës janë vetëm fjalë të kota.\"

\"Në bazë të parashikimeve që ka bërë kjo Qeveri, po ta kishim buxhetin e Zvicrës apo një buxhet multimilionësh, nuk do të mund t’i përmbushnin kërkesat e tyre. Pra, një numër të prioriteteve që i ka paraparë kjo Qeveri nuk përkojnë me realitetin”, ka deklaruar Haradinaj.

Ai ka vlerësuar se kjo Qeveri është e pafuqishme dhe e shantazhuar nga Lista Serbe.

“Tash e sa muaj Qeveria e Kosovës nuk është e kompletuar. Shumë ministra me vetura zyrtare sillen nëpër Serbi, marrin rroga në Prishtinë. As ministrat e as deputetët e komunitetit serb tash e disa muaj nuk i shohim në zyrë. Kjo dëshmon se kjo Qeveri nuk është ekzekutive. Po të ishte ekzekutive dhe serioze do të merrte masa të shpejta për ta zëvendësuar ministrin”, është shprehur Haradinaj.

Daut Haradinaj, i cili mban edhe postin e kryetarit të Komisionit Parlamentar për Punë të Brendshme, Siguri dhe Mbikëqyrjen e FSK-së, e ka komentuar deklaratën e kryeministrit Mustafa, se Forcat e Armatosura të Kosovës nuk do të shkojnë në veri pa koordinim me KFOR-in. Haradinaj ka thënë se FAK-u gjithsesi duhet të operojë edhe në veri.