Prishtinë, 12 korrik - I nominuari për kryeministër i koalicionit parazgjedhor PAN, Ramush Haradinaj, ka pritur sot në takim shefen e Zyrës së BE-së dhe Përfaqësuese e Posaçme e BE-së në Kosovë, Natalia Apostolova.

Në një komunikatë të Aleancës për Ardhmërinë e Kosovës bëhet e ditur se kryetari Haradinaj dhe ambasadorja Apostolova kanë biseduar për procesin e krijimit të institucioneve të reja në vend pas certifikimit të rezultateve nga Komisioni Qendror Zgjedhor.

Kryetari Haradinaj më këtë rast ka thënë se Kosova shumë shpejt do t’i formojë institucionet e reja në përputhje të plotë me vullnetin e shpehur të qytetarëve në zgjedhjet e 11 qershorit.

\"Të dy bashkëbiseduesit folën edhe për proceset e integrimeve evro-atlantike për Kosovën dhe rëndësinë e përshpejtimit të zbatimit të Agjendës së Reformës Evropiane në rrugën e integrimeve\", thuhet në komunikatë.

Kryetari Haradinaj ka theksuar se agjenda e integrimeve evro-atlantike do të jetë në krye të prioriteteve në politikat dhe vendimmarrjen qeverisëse gjatë mandatit qeverisës katër vjeçar.