Haradinaj edhe një mandat kryetar i AAK-së
Pas rizgjedhjes së tij në krye të AAK-së, z. Haradinaj, ka falënderuar të gjithë delegatët për besimin e dhënë dhe është zotuar se do të bashkëpunojë me të gjithë, për t’i çuar përpara programin dhe synimet e AAK-së, drejt një qeverisje më të mirë dhe më të dinjitetshme për vedin dhe qytetarin e Kosovës.
Kryetari Haradinaj e ka cilësuar momentin e rizgjedhjes së tij si një fillim dhe moment të ri në krye të AAK-së dhe është zotuar se do të respektojë ta kaluarën dhe do të punojë për më shumë zhvillim në të ardhmen, në strukturën, politikat dhe vizioni e votuesit, anëtarit dhe simpatizantit aleancist.
Është obligim yni angazhimi i përbashkët për një qeverisje më të dinjitetshme për vendin tonë, për qytetarin tonë, ka thënë Haradinaj.
“Po na pret shumë punë për të udhëhequr me vendin. Para ligjit duhet të jemi të gjithë të barabartë, nëse lejojmë të kemi njerëz mbi ligjin nuk do të shkojmë rrugës së duhur. Jo jashtë ligjit dhe jo mbi ligjin”, ka thënë Haradinaj në Kuvendin e VI zgjedhor të AAK-së.
Kur ka folur për qeverisjen në vend, Haradinaj ka thënë se AAK-ja së bashku me aleatët e saj do udhëheq një qeverisje pa korrupsion.
“Pushtetarët tanë sot fshehën pas ndërkombëtarëve kur marrin vendime. Ne po ofrohemi për një qeverisje zhvillimore, pa varfëri dhe për një qeverisje pa korrupsion. Do të ketë një qeveri të pastër pa bërllok”, ka thënë Haradinaj.
